13 lojtarë të Realit në listën e realizatorëve!

Treshja Ronaldo-Bale-Benzema nuk është e vetmja që shënon tek Real Madridi. Janë gjithsej 13 futbollistë që e kanë shijuar të paku një gol këtë sezon. Por lista mund të pasurohet deri në fund të sezonit.

Nuk ka dyshim se më së shumti gola te Real Madridi ka shënuar treshja ‘BBC’, e cila përbëhet nga Cristiano Ronaldo, kryeshënuesi, Gareth Bale dhe Karim Benzema.

Por, tre të lartpërmendurit nuk janë të vetmit që kanë realizuar në këtë sezon të pasur me gola për ‘Los Blancos’.

Madje, pas golit që e realizoi Marcelo ndaj Levantes, numri i futbollistëve që kanë shënuar këtë sezon u shtua në 13 gjithsej.

Arbeloa, Pepe, Marcelo, Illarra, Isco, Modric, Di María, Khedira, Jesé, Morata, Benzema, Bale e Cristiano, e përbëjnë listën e shënuesve të ekipit të Carlo Ancelottit.

Kësaj liste i mungojnë lojtarët si Varane, Nacho, Casemiro, Carvajal, Ramos, Coentrao e Xabi Alonso.

Ajo që është e habitshme është mungesa e golit nga ana e Sergio Ramos, i cili që prej kohës kur ishte transferuar te Real Madrid, në sezonin 2005/06, kishte shënuar në çdo sezon.

Edhe Carvajal njihej për shënimin e golave kohë pas kohe, njëjtë si Xabi Alonso, të cilit nuk i kalonte asnjë sezon pa shënuar më parë. Mirëpo, deri në fund të sezonit ka mbetur ende për t’u luajtur dhe nuk i dihet kurrë. Lista e golashënuesve mund të pasurohet.