Behrami e Xhemaili në pykëpyetje te Napoli

Dy mesfushorët shqiptarë Valon Behrami e Blerim Xhemaili pritet të largohen nga skuadra e Napolit në fund të këtij edicioni. Këtë e ka bërë të ditur prestigjiozja italiane e sportit, "Gazzetta dello Sport", duke saktësuar se trajneri Rafael Benitez ka dhënë dritën e gjelbër për largimin e Behramit dhe Xhemailit.

Benitoz synon një skuadër të aftë për titull kampioni ndaj gjatë verës ka në plan disa blerje të tjera me të cilat pretendon titullin e kampionit në Serie A.

Mësohet se Behrami e Xhemaili do ta lirojnë vendin për ardhjen e Javier Mascheranos (Barcelona) dhe Fernando (Porto), që pëlqehen shumë nga Benitez.

Behrami 28-vjeçar, ka kontratë me Napolin deri në vitin 2017 dhe po kërkohet me insistim nga skuadra e Interit. Ndërsa, Xhemaili 27-vjeçar ka kontratë me Napolin deri në vitin 2017 dhe pritet që karrierën ta vazhdojë në Bundesligë.