FIFA: Futbollistët kosovar mund t’i bashkohen Kosovës

Drejtuesit e lartë të FIFA-së kanë bërë të ditur se të gjitha futbollistët nga Kosova mund të jenë në shërbim të përfaqësueses së tyre.

Kosova shumë shpejt do të mund të llogarit në të gjithë futbollistët e saj që luajnë për kombëtare të huaja. Në fakt, i mbetet vet futbollistëve të vendosin nëse duan t’i bashkohen Kosovës dhe kjo tashmë është konfirmuar edhe nga drejtues të lartë të FIFA-s.
Kjo temë është duke munduar prej kohësh drejtuesit e Federatës së futbollit të Kosovës dhe asaj të Zvicrës. Madje këta të fundit kanë filluar të mendojnë se futbollistët e tyre shqiptar nga Kosova nuk do t’i kenë në dispozicion për kualifikimet e botërorit, "Rusia 2018".

Shefi i komunikimit në FIFA, Valter di Gregorio ka deklaruar për gazetën zvicerane "Blick" se futbollistët mund t’i bashkohen përfaqësueses së Kosovës. “Po, probabiliteti është shumë i madh që Shaqiri dhe shokët e tij do të mund të luajnë për Kosovën, nëse këtë vërtetë e duan”.

Në një artikull të ekzagjeruar në "Blick", shpjegohen edhe faktet politike, sidomos ato që kanë të bëjnë me anëtarësimin e Kosovës në OKB e që është pengesa më e madhe e hyrjes së Kosovës në FIFA e UEFA me të drejtat e plota. Gjithsesi se ky medium zviceran konstaton faktin se përfaqësuesja e Kosovës në atë rast do të ishte shumë e fuqishme.