Ky është njeriu që mbanë rekordin me tatuazhe

Njeriu më i tatuar në Britaninë e Madhe, që e ka ndryshuar emrin e tij në “King of Inkland”, ka shpenzuar 6 mijë stërlina për të fshirë disa tatuazhe, pasi në trupin e tij nuk kishte më vend ku dëshironte të bënte disa të reja.

Matthew Whelan nga Birmingami, ka mbuluar gjithë trupin e tij me bojë, përfshirë qepallat e syve, por tani mendon se atyre tatuazheve u ka dalë moda dhe u ka ikë trendi.

34-vjeçari ka vënë mënjanë 6 mijë stërlina për procesin e dhimbshëm të heqjes së tatuazheve me lazer, pasi e sheh veten si një “galeri arti” që ka nevojë të evoluojë.

Whelen, që shpesh herë identifikohet si “Mbreti i artit trupor”, ka shpenzuar gjithsej 13 mijë stërlina për tatuazhet në trupin e tij, të parin e të cilëve, një bulldog britanik e ka bërë kur ishte vetëm 16 vjeç. Por tani, pas pothuajse dy dekadash, atij i duhet të freskojë koleksionin.

“E shoh veten si një galeri arti. Me kalimin e kohës arti vjetrohet dhe njerëzit duan të shohin diçka të re. Pikërisht kështu ndihem unë për tatuazhet e mia”, ka thënë Whelan.

“Kam bërë shumë tatuazhe dhe tani s’kam më vend në lëkurë, kështu që mendova: përse të mos i heq me lazer”?, shton 34-vjeçari.